日軍點解要空襲荃灣

荃灣係上世紀香港其中一個發展成功嘅新市鎮，而响好耐之前呢度已經有墟市同原居民村落。响香港保衛戰爆發期間，日軍就向呢個唔係市中心嘅地方進行空襲，點解日軍會炸呢個地方呢？

根據阿史搵到嘅資料就歸納咗兩個原因。第一個就係呢個地方係當時新界西部地方進入九龍嘅重要通道，當時日軍入侵新界，228及230聯隊由羅湖同落馬洲入侵元朗，經青山公路沿線至荃灣，所以荃灣就成為被攻擊嘅地方。另一個更重要嘅原因，就係上世紀30年代，德士古石油公司選址荃灣設立油庫。呢個油庫叫「德士古荃灣石油公司油庫」，係當時香港其中一個重要燃料儲存之地。而响日軍入侵香港嘅時候，對香港具軍事價值嘅基礎設施都進行空中轟炸，德士古油庫亦唔例外。據講當時油庫被日軍轟炸，燒著咗嘅燃油湧入個海度，成個海好似燒著咗咁。

之前阿史都介紹過，戰後德士古油庫一帶就發展成工業區，原本通往油庫嘅德士古道就成為荃灣工業區嘅主要道路。至於德士古油庫就喺1983年拆卸，原址就發展成大型屋苑海濱花園。